公仔是一世的朋友 毛公仔醫生教你照顧「童伴」

「公仔是一世的朋友」，相信對公仔有情意結的愛好者都會認同這句說話，不過保養公仔的正確方法就未必人人都識。Magic Lab兩位80後公仔醫生Raymond及Ryan分享日常打理公仔的方法及常見問題，方便公仔愛好者為心愛的公仔自行作簡單的保養。

1. 用膠袋套著公仔可防塵？

毛公仔容易惹塵埃，不少人為求幫公仔防塵，會以膠袋套著公仔，甚至用保鮮紙包起公仔。Ryan不建議此方法，雖然能夠防塵，但攬著公仔時感覺像「攬住層膠」，失去原本擁抱公仔的質感。

如果公仔染塵，公仔醫生建議用毛刷輕輕拍走公仔表面的塵，但避免用毛刷梳毛，以免令公仔甩毛。

▲ 用毛刷輕拍，即可拍走公仔表面的塵，但不要大力為公仔梳毛(曾有為 攝)

2. 為什麼棉花會變形？

新買的公仔大多數都「肥嘟嘟」，但愈攬得多就愈瘦。Raymond指由於新出廠的公仔，內裏的棉花比較蓬鬆，所以公仔會比較「大隻」。但當主人攬得多，會令棉花愈壓愈實。類似的情況亦會出現在公仔的手腳位置，經常郁動公仔手腳，會容易令公仔的肩膀及大髀接合位的棉花分開，看起來無力垂下。

雖然棉花壓實了會令公仔看起來變得瘦削，但公仔醫生指是難以避免的情況，所以有客人會把公仔送去公仔診所換棉花，重新泵入蓬鬆的棉花。

不過要做好心理準備，當接回公仔時，公仔變回「肥嘟嘟」的身材，主人可能會看不慣。

▲ Ryan示範為公仔泵棉花，而換棉花需把公仔本身的棉花清空，再泵入新棉花。(曾有為 攝)

3. 塗護膚品後不要攬公仔？

Ryan提醒女士不要在面或手上塗有護膚品、化妝品或帶有油脂的情況下觸摸公仔，因為會黏在公仔表面，難以自行清潔。

【延伸閱讀】兄弟幫的Toy Story　公仔醫生：公仔是一世的朋友

4. 放於陽光下會變色？

把公仔放在陽光、紫外線下，能夠做到基本消滅細菌的效果，但時間切忌太長，否則公仔有可能變色或脫色。

5. 毛公仔導致敏感？

不少家長擔心，小朋友玩毛公仔會導致鼻敏感。其實導致鼻敏感的致敏原是積聚於公仔的塵蟎，Raymond指以高溫蒸汽清潔公仔，能夠殺死塵蟎，清潔過後就不再怕鼻敏感，最理想是每年蒸汽清潔公仔一次。

6. 乾洗與蒸汽清潔毛公仔有何分別？

曾任家電廠、參與研發蒸氣清潔電器的Raymond表示，如果把公仔送到乾洗店，清潔途中有可能加入化學品令表面的毛黏著變得「一嚿嚿」，或棉花變形，亦試過有客人的公仔在乾洗後「頭身分離」。

所以，公仔醫生比較主張用蒸汽清潔毛公仔，不需使用化學品，減低公仔主人致敏的機會。而且公仔所有部位(如頸部、腋下部分)都能仔細清潔，確保公仔「污糟來、乾淨走」，而且也能令之前黏在一起的毛回復蓬鬆，真正「鬆毛鬆翼」。不過，蒸汽清潔必須全人手處理，要逐隻排隊，所以不能同一時間為多隻公仔「洗白白」，比較耗時，效率比乾洗低。

【其他熱話】90後少女挪威賣魚儲錢 創手袋品牌營業額過百萬

【其他熱話】大腸癌發病率高過肺癌 邊種癌症是頭號殺手？

【其他熱話】抛開名校枷鎖尋回自信 讀寫障礙中五生重燃讀大學希望